Сайттан издөө
Сайттан издөө
Кыргыз Республикасынын Президенти

«Кыргыз Республикасынын Куралдуу Күчтөрүнүн Башкы штабы жөнүндө» Кыргыз Республикасынын Президентинин Жарлыгы

Бүгүн, 2014-жылдын 6-февралында, Кыргыз Республикасынын Президенти Алмазбек Атамбаев «Кыргыз Республикасынын Куралдуу Күчтөрүнүн Башкы штабы жөнүндө» Жарлыкка кол койду.

Жарлыктын тексти:

“Кыргыз Республикасынын Конституциясынын 64-беренесинин 8-бөлүгүн, 65-беренесин, “Коргоо жана Кыргыз Республикасынын Куралдуу Күчтөрү жөнүндө” Кыргыз Республикасынын Мыйзамына толуктоолорду жана өзгөртүүлөрдү киргизүү тууралуу” Кыргыз Республикасынын 2014-жылдын 3-февралындагы № 24 Мыйзамынын 2-беренесин жетекчиликке алып жана Кыргыз Республикасынын Куралдуу Күчтөрүн башкаруу системасын реформалоо жөнүндө маселе боюнча Кыргыз Республикасынын Коргоо кеңешинин 2013-жылдын 5-июлундагы № 4 чечимин ишке ашыруу максатында токтом кылам:

1. Кыргыз Республикасынын Куралдуу Күчтөрүнүн Башкы штабы Куралдуу Күчтөрдү жана башка аскердик түзүлүштөрдү аскердик башкаруунун борбордук органы жана оперативдүү башкаруунун башкы органы катары аныкталып, Кыргыз Республикасынын Куралдуу Күчтөрүнүн Башкы штабына өзгөртүп түзүлсүн.

2. Алымкожоев Асанбек Тунгучпаевич Кыргыз Республикасынын Куралдуу Күчтөрүнүн Башкы штабынын начальниги болуп дайындалсын.

3. Кыргыз Республикасынын Куралдуу Күчтөрүнүн Башкы штабынын начальниги Кыргыз Республикасынын коргоо министринин, Кыргыз Республикасынын Мамлекеттик чек ара кызматынын төрагасынын, Кыргыз Республикасынын Улуттук гвардиясынын командачысынын жана алардын орун басарларынын кызмат ордуларына дайындоо үчүн талапкерлерди киргизсин.

4. Кыргыз Республикасынын Өкмөтү Кыргыз Республикасынын Куралдуу Күчтөрүнүн Башкы штабынын начальнигинин сунуштарын эске алуу менен:

1) ушул Жарлыктан келип чыккан уюштуруу-укуктук жана башка маселелерди чечсин;

2) өзүнүн чечимдерин ушул Жарлыкка ылайык келтирсин.

5. Бул Жарлыктын аткарылышын контролдоо Кыргыз Республикасынын Коргоо кеңешинин катчылыгына жүктөлсүн.

6. Бул Жарлык расмий жарыяланган күндөн тартып күчүнө кирет.

Кыргыз Республикасынын

Президенти                                                                                                   А.Ш. Атамбаев

2014-жыл 6-февраль