Сайттан издөө
Сайттан издөө
Кыргыз Республикасынын Президенти

Жергиликтүү соттордун судьяларын дайындоо жана жиберүү жөнүндө Жарлыктарга кол коюлду

Кыргыз Республикасынын Судьяларды тандоо кеңеши тарабынан Кыргыз Республикасынын Президенти Алмазбек Атамбаевге судьялык кызматтарга талапкерлер сунушталды:

- КР Жогорку сотуна - 5 адам;

- жергиликтүү сотторго: Кызыл-Кыя шаар сотуна (1 адам), Баткен облусунун Баткен (1 адам) жана Кадамжай (1 адам) райсотторуна, Талас облусунун Талас шаар сотуна (1 адам) жана Нарын облусунун Нарын шаар сотуна (1 адам) – бардыгы 5 талапкер.

2016-жылы 16-декабрда Мамлекет башчысы талапкерлердин айрымдары менен аӊгемелешти. Анын жыйынтыгын жана кошумча алынган маалыматтарды эске алуу менен Кыргыз Республикасынын Президенти КР Жогорку сотунун судьялыгынын кызматына 3 талапкер жана жергиликтүү соттордун судьялыгынын кызматына 4 талапкер боюнча аталган Кеңештин сунуштарына макулдугун берди.

Ар кайсы мамлекеттик органдардан кошумча алынган маалыматтарды жана пикирлерди изилдөөнүн жыйынтыгы боюнча Президент Алмазбек Атамбаев 2016-жылы 26-декабрда 3 талапкер боюнча материалдарды Судьяларды тандоо кеңешине кайтарып берди.

Андан ары КР Жогорку сотунун судьялыгынын кызматына талапкерлерди кароо жана көрсөтүү «КР судьяларынын статусу жөнүндө» КР конституциялык мыйзамынын 18-беренесине ылайык жүзөгө ашырылат.

КР жергиликтүү сотторунун судьялыгынын кызматына талапкерлер боюнча Мамлекет башчысы 2 жарлык чыгарды.

Биринчи жарлык менен конкурстардан тандалган 4 талапкер  Кыргыз Республикасынын Конституциясына ылайык мөөнөт менен жергиликтүү соттордун судьялык кызматына дайындалды.

Экинчи жарлык менен дайындалган 4 судья судьялык ыйгарым укуктарын аткаруу үчүн жиберилди:

Кызыл-Кыя шаар сотуна: Ахматов Нурлан Төлөгөнович, Баткен райондук сотуна: Оморов Расул Бактыбекович,  Кадамжай райондук сотуна: Алимбекова Жылдыз Кубанычевна, Нарын шаар сотуна: Жоробекова Айнагүл Мамаюнусовна.

Андан ары жергиликтүү соттордун судьялыгынын калган кызматтарына талапкерлерди кароо жана көрсөтүү «КР судьяларынын статусу жөнүндө» КР конституциялык мыйзамынын 18-беренесине ылайык жүзөгө ашырылат.

2016-жыл 26-декабрь